Ua toe o se aso ma’ea lenei masina o Setema, la’asia atu ai Oketopa ma taunu’u ia Novema o lenei tausaga, o le a fa’amanatu ai e le mafutaga a e sa a’o’oga i le Kolisi o Avele, le atoaga o le 30 tausaga talu ona talia e le malo le ulufale o tamaitai i le kolisi na amata sa nao le itupa o alii sa a’oa’oina ai.
Ua fa’ailoa i le upega tafāilagi a le ACOPA poo le Asosi o ali’i ma tama’ita’i sa a’oa’oina i Avele le faia o tapenaga mo le faamanatuina o le 30 tausaga lea e pa’u tonu ile aso 13 o Novema le aso na va’aia ai mo le taimi muamua tama’ita’i ua a’o’oga faatasi ma tama tane i totonu o le Kolisi ia Novema o le tausaga e 1996.
O le uluai tama’ita’i o le Kolisi na avea ma ta’ita’i ulu poo le head-girl o le afioga Lemalu Ruta Masinalupe. Ua fa’aalia e le komiti o loo tapenaina lea faamoemoe o Avele, o loo tapena le polokalame ma le fuafuaga o le a fa’ailoa lautele i se taimi mo le nofo silafia e sui o le ACOPA aemaise i tama’ita’i tuai o le kolisi sa a’oa’oina mai ia Novema o le tausaga e 1996 seia oo mai i le tausaga na tea nei 2025.
O le Aso Lulu na te’a nei na fono ai se vaega o tama’ita’i tuai e faamaopoopo a latou tapenaga mo le samiina o le 30 tausaga.
Comments
Loading comments…