E ta’i afe tālā ua totogi i le faamasinoga ma leoleo i le galuega sa su’esu’e, ma molia ai se taule’ale’a e fai lana pisinisi o se faleoloa e faagaioi i totonu o le latou nu’u. O Ianuari o le tausaga nei i le 4 i le vaveao na osofa’i ai e leoleo le faleoloa o Carl Laulualo i sailiga o fuala’au faasāina, ma maua ai e leoleo se meafaitino o se paipa tioata i totonu o le faleoloa.

Na molia ai le faipisinisi ma ia ioeina le moliaga ma ta’utino ai i leoleo sa ia fa’aaoga le paipa e ula ai le fuala’au faasāina o le ‘aisa. Sa finau le loia sa tū mo Carl e ao i le faamasinoga ona faatāua i sana faai’uga le tulaga ua salamo moni lē ua molia, ma ua ia lagona foi mafatiaga ina ua aafia i le solitulafono o le umia o se meafaitino e feso’otai lona fa’aaogaina i nakoti poo fuala’au faasāina.

Advertisement

Sa finauina ai e le loia o Quentin Sauaga le talosaga e faapafale se fa’asalaga e aunoa ma le faamaonia o le moliaga lea e ta’ua o le discharge without a conviction. I le iloiloina o mau ma finauga a leoleo ma le loia sa tulai mo lē ua molia, na taunu’u le faamasino sinia o le Faamasinoga Faaitumalo le afioga, Talasa Atoa Saaga, i lona lē faia o se faasalaga faafalepuipui, ae nofo va’ava’aia Carl mo le 18 masina ma lipoti i se tagata faigaluega o le ofisa faanofo va’ava’aia i masina ta’itasi.

Ua faamaonia ai le solitulafono ae te’ena le talosaga e faapafala se faasalaga e aunoa ma le faamaonia o le moliaga.

Ua faia lea faai’uga ina faamauina ai le ogaoga o solitulafono e aafia ai fuala’au faasāina. E lua afe le aofa’iga atoa o le tupe ua faatonuina lē ua molia e totogi e avea ma ona sao i le tau o le galuega a le faamasinoga ma leoleo.