O le Aso Tofi o le vaiaso nei sa fa’atulaga e aumai ai se fa’aiuga a le fa’amasinoga maualuga i le talosaga a Michael Gibson o se tagatanu’u o Niusila i lana talosaga e toe fetuuna’i aiaiga o loo tatala ai i tua ona o loo fia malaga ese ma le atunu’u ma le fuafuaga e toe fo’i mai e tali moliaga o lo’o ia tē’ena, o lona umia ma le fa’aulufale i Samoa o la’au faasāina o le maruana lea na fafao mai i se fagu shampoo.

Ua toe tolo le lauina o le fa’aiuga i lana talosaga ina ua fa’ailoa e loia a leoleo, e lua isi moliaga fa’aopoopo ua tuua’ia ai lea tagatanu’u o Niusila, o solitulafono o lona a’afia i tupe ‘ele’elea poo money laundering.

O Michael Gibson ose tasi o se au faigaluega mai Niu Sila o loo galulue i Samoa i le pu’eina ose ata tifaga. O le vaiaso o muamua nei o le a vala’au ai moliaga fou o lea taule’ale’a mo le tu’uina atu o sana tali.