Toe ulufale le J.A.W.S e avea ma sui lesitala o le P.I.N.A

Aso Faraile 25 o Setema 2026

Ua toe ulufale e avea ma sui resitala o le faalapotopotoga o galuega faatusitala ma faasalalau a le Pasefika le asosi o tusitala ma le au faasalalau a Samoa, i le tuana’i o le silia i le sefulu tausaga e le’i toe atoatoa le avea o le asosi ma sui auai ole P.I.N.A. le Pacific Island News Association.

O le aso mulimuli o le fono tai lua tausaga ma usuia a le faalapotopotoga na folasia ai e le usugafono mai Samoa le toe auai o le JAWS o se sui lesitala o le faalapotopotoga, ma le fanaunautaiga ia toe maua le galulue faatasi ma isi atunu’u.

O avanoa foi o le a toe fetufaa’i ai tomai o le galuega ma maua a’oa’oga mo ali’i ma tama’it’ai o loo tautua ma galulue i lea tomai.

Sa maua le avanoa i le Peresetene o le J.A.W.S mo sona finagalo i nisi o mataupu tāua sa faatalanoa ma faasoa iai finagalo o usugafono i lenei vaiaso.

Se fa’atalanoaga ma le tama’ita’i Peresetene o le JAWS le asosi o tusitala ma le ‘au faasalalau a Samoa ia Taliilagi Keresoma, i lona auai ai i le fono a le Faalapotopotoga o Tusitala ma le ‘Au Faasalalau a le Pasefika le P.I.N.A.

O le Aso To’ona’i e toe taliu ai i fanua le usugafono a le JAWS, sa fa’atupe lo latou auai e le polokalame fesoasoani mo galuega faasalalau a le malo o Ausetalia, le PACMAS, fa’apea le polokalame fesoasoani a le televise a Peretania lea e ta’ua o le BBC Media Action.