A’o fa’agasolo ai pea le galuega o le resitalaina o fanauiti mai pepe fou e oo i fanau ua aulia le 35 masina o le matutua mo le fa’amanuiaga tau tupe i le penefiti mo le soifua mālōlōina, e oo mai i le Aso Faraile na te’a nei, le aso 16 o Oketopa, ua 4 afe selau sefululima tamaiti ua uma ona resitala.

Ua fa’ailoa lea aofa’iga e le Matagaluega o Aiga ma Agafeso’ota’i ma fa’ailoa ai e 72 pasene o fanauiti o loo manaomia e resitala a’o le’i amata ona fa’atino lea polokalame a le malo, ma ua ave ai le fautuaga a le Matagaluega i mātua ma ē o va’aia fanau e agava’a i le penefiti ina ia tatau ona oo atu e faia le resitala a’o tatala pea le faitoto’a e pei ona fuafua e mae’a i le aso 30 o Novema.

O le polokalame fesoasoani lenei o le a maua ai le selau tālā i le atoa o le masina muamua o le matua o se pepe i le mae’a faia o le pepa fanau ma le tui o le gasegase o le Hepatitis B, 9 masina le matua o le pepe ae maua le isi selau tālā pe a mae’a tui puipui o le 6 ma le 14 vaiaso, fa’aauau ona maua le selau tālā pe a mae’a le 12 ma le 15 masina o fanauiti, maua le isi fa’amanuiaga tau tupe e selau tālā pe a aulia le 30 masina o le matua o le tamaititi ma ua mae’a ona siaki poo ua mae’a uma tui puipui e tatau ona faia.

E 20 miliona tala o loo fa’atatauina e le malo e fa’aalu i le polokalame lea, o le a amata i le tausaga fou 2027. O le masina o Iulai o le tausaga nei na faalauiloa ai e le malo lana polokalame fou o le penefiti tau soifua mālōlōina mo le puipuia o le soifua tuputupu a’e o pepe ma fanauiti e agavaa i le polokalame.