O se avanoa tāua mo le mamalu o le atunu’u o alala i le motu tele o Savai’i i le Aso Lua o lenei vaiaso, o le a feiloa’i ai i le afioga Anae Arthur Anae ma sui o le mau o le sā’ilia o le amiotonu mo tagata pasefika le Pacific Justice, i se taumafaiga e sa’ili le lagolago a o tatou tagata i ni suiga ua folafola e lea faalapotopotoga ua tatau i le malo o Niu Sila ona faagaioia ai le faiga o talosaga nofomau i Aotearoa i tausaga ta’itasi, lea e faaigoaina o le New Zealand Immigration Quota Scheme.

O se tasi o suiga ua fa’ailoa lautele o loo finauina e le mau a le Pacific Justice o le avanoa e mafai ai ona malaga i Niu Sila se tagata ua manuia i le se’i o le nofomau e sa’ili se galuega. Ua mafua lea suiga ona o le tasi lea o mafua’aga o le maumau o le avanoa ua manuia ai i le se’i ona o le tuai ona maua o se pepa faigaluega, poo le maua foi ae e iai fa’aletonu.

Pacific Justice members in Samoa. Photo: Pacific Justice

O le polokalame nofomau a Niu Sila o loo avanoa ai o tatou tagatanu’u ma isi mai atunu’u o le pasefika o loo agava’a iai, ona maua le avanoa e nofomau ai i Aotearoa. O le faatinoina o ia suiga e le malo o Niu Sila o le sainigalima poo le petition e manaomia tele ai le tutū faatasi o o tatou tagata mai lava i Ekalesia e oo i pulega a nu’u aemaise le malo, ina ia mafai ona taunu’u le faamoemoe o le Pacific Justice i Niu Sila ma Samoa.

O le polokalame nofomau i Niu Sila o loo maua ai avanoa oo tatou tagata e sa’ili manuia i lea atunuu e le gata o galuega, ae o a’oa’oga mo fanau lalovaoa o Samoa.

O le afiafi o le Aso Gafua o lenei vaiaso fou e feiloa’i ai le afioga Anae Arthur Anae ma lana au malaga ma sui o le au tusitala ma le au faasalalau e faia i le fale’aiga o le Sails i Mulinuu. O se avanoa e faailoa lautele ai e Anae ma sui o le Pacific Justice le autū o lana mau o loo momoli ma fa’amatalatala ai foi mafua’aga.

O lea feiloaiga e faia i le afiafi o le Aso Gafua a’o lei malaga atu le au malaga i Savai’i mo le feiloaiga ma le atunu’u i Salafai e faia i le maketi i Salelologa, lea e amata i le ‘afa o le iva (9:30 am) i le taeao o le Aso Lua aso 20 o Oketopa.