Talu mai le fitu o le afiafi o le Aso Sa ananafi i Samoa ao le Aso Toona’i lea i Amerika Samoa, o le faamatalaga lata mai o uiga loulouā o le tau mo Samoa na fa’ailoa ai e le Ofisa o le Va’aitau i Mulinuu le maualalo o le avanoa e aafia ai lo tatou atunu’u i matagi o le afa ua fa’aigoaina o Wati.

O se afā ua nofo tapenapena iai motu o le Atu Kuki. E ta le fitu i le afiafi o le Aso Sa o lo’o mamao ese ma Samoa matagi afā o Wati i le 1,140 kilomita ma aga’i ese pea i saute i sasa’e ma fa’asolo ina fa’aitiitia i totonu o le isi 24 itula.

O le vaiaso ua mavae na fa’ailoa ai e le vaega o su’esu’ega faasaienisi o le Earth Science i Niu Sila le mā’ale’ale o tulaga e ono a’afia ai atunu’u o loo i le ogatotonugalēmū o le Pasefika e aofia ai Samoa i le faatupula’ia mai le fitu i le sefulutasi afā ua uma ona fa’aigoa e ono āfea ma a’afia ai. O le fautuaga ua aumai e tāua le nofo sauniuni ma tapenapena iai.