Aso Gafua, 12 Oketopa 2026.

O le mae’a ai ona tagofia e le faamasinoga o tagi o le palota sa sa’ili ai sui usufono o le paea’iga sefuluvalu a le palemene, ua faailoa lautele ai e le Komesina o Faiga Palota ma le filifilia o le nofoa faaopoopo o tinā ma tama’ita’i i le palemene e atoa ai iai le to’aono o faipule tama’ita’i e tusa o le aiaiga o le 10 pasene.

Ua toe filifilia ai le afioga Ali’imalemanu Alofa Tu’uau sa tauvā i le palota tele o le masina o Aukuso o le tausaga ua mavae e tau’aveina le nofoa faaopoopo e atoa ai le numera o faipule tama’ita’i. O le paea’iga 17 a le palemene sa filifilia ai foi le afioga Ali’imalemanu Alofa Tu’uau i le nofoa faaopoopo lava o tama’ita’i, i le tuanai o faamasinoga sa lu’iina ai le numera tonu o nofoa o tama’ita’i i le palemene i le aiaiga o le 10 pasene.

O ia faamasinoga e pei ona silafia sa finauina o le 5 le aofa’iga tonu o nofoa o tama’ita’i i lalo o lea aiaiga o le tulafono fa’avae, peita’i sa faafeto’ai lea finauga i le isi mau e 6 ae le lima sui faipule tama’ita’i. O le iuga a le faamasinoga o talosaga apili ua faamanino ai lea finauga e le to’alima ae to’aono faipule tama’ita’i e faamalieina ai le aiaiga o le 10 pasene.

E iai le talitonuga o loo iai se tapenaga a le malo e toe teuteu ai lea aiaiga i ni teuteuga o le a tu’uina atu e faatalanoa i le palemene i se taimi o le paea’iga o loo faagasolo a le nofoa’iga faapalemene lona 18. O le afioga Ali’imalemanu Alofa Tu’uau sa tauvā i le nofoa o le itumalo palota o Alataua i Sisifo i le palota tele o le tausaga ua mavae ae e lei manuia, peita’i o palota na ia maua e 477 ua na ausia ai le 10 pasene o palota uma na maua e isi sui tauvā tama’ita’i mai itumalo faapalota na tauvā i le palota tele o le tausaga 2025 lea ua agava’a ai ona ia tau’ave le nofoa faaopoopo o sui faipule tama’ita’i i le palemene.

O le sui na filifilia e Alataua i Sisifo i le palota tele i lo latou nofoa i le palemene o le afioga Taituave Lafaitele Valoaga Iona na ia maua le aofa’iga o palota e 522, ma o se sui faipule o le itu faaupufai o le Faatuatua i le Atua Samoa ua Tasi.

O le afioga Ali’imalemanu Alofa Tu’uau o le sui lagolago o le vaega faaupufai e puipuia aiā tatau a tagata o loo avea nei ma itu agai. O le faatulagaga la o nofoa o le palemene ua iai nei ina ua faasilasila aloa’ia le nofoa faaopoopo o faipule tamaitai ua 52. O lona vaevaega e 34 nofoa o le Faatuatua i le Atua Samoa ua Tasi, 13 nofoa o le vaega e puipuia aia tatau a tagata, ae to’alima faipule tutoatasi lea o loo aofia ai sui faipule e to’atolu o le pati faaupufai o le Samoa ua Potopoto.

O aiaiga o tulafono tumau a le palemene o Samoa e lē aloa’ia i totonu o le saofaiga faapalemene se vaega faaupufai e le maua le to’avalu poo le sili atu o sui faipule, ma e avea ma sui tutoatasi pe a le maua lea aofaiga o nofoa.