Aso Faraile, 09 Oketopa 2026.

Ua molimauina mai le ogatotonu o lenei vaiaso se’ia mai i le faai’uga lenei o le vaiaso a’o lumanai le aso Sa lona lua o Oketopa o lenei tausaga e fa’ailoga ai le Aso Sa o le fanau, le ‘u’umi o laina o ta’avale, ona o tagata e aga’i i galuega auā o loo tū’ua le tele o a’oga i Samoa, ae o tagata foi o loo aga’i mo faatauga o le Aso Sa o tamaiti.

E fa’i o fa’atauga o lavalava ma tēuga ‘i’ila ma fe’ilafi a’o le vaega o faleoloa ua tumutumu i le faatauga o taumafa ‘ese’ese.

O le tala faasolopito o le Aso Sa o le lotu a tamaiti o loo faamauina ai o le LMS poo le Sosaiete a Minisionare mai Lonetona i Peretania sa iloa tele ai i le Ekalesia LMS i Samoa na ulua’i faavaeina lea Aso Sa o le fanau.

O le mae’a o le fonotele i Malua a le LMS i le masina o Me o le tausaga e 1898 na faai’uigafonoina ai le faia loa o se Aso Sa e faapitoa i fanau, ma o Iuni o le tausaga lava lea i le Aso Sa mulimuli na amata ai loa le aso o le lotu a tamaiti ma ua atoa i le tausaga nei le 128 o tausaga o le lotu a tamaiti poo le Aso Sa Pa’epa’e o le fanau.

Na toe suia le masina e faia ai i le masina o Oketopa i lona aso Sa lona lua lea ua avea ma aso tausi e faia ai i tausaga uma.

Ua fa’ailoa i faamaumauga o le tausaga e 1998 na fa’ailoga ai le selau tausaga o lea aso tāua mo fanau a Samoa, ma ua faamamalu ma faatāua foi e le tele o Ekalesia Kerisiano i lo tatou atunu’u faapea atunu’u i fafo o loo salalau ai le Ekalesia Faapotopotoga Kerisiano Samoa ma isi ekalesia o loo tapua’i ai o tatou tagata na ola ma soifua a’e i Samoa latou te masani i le faatāua o le Aso Sa o le lotu a tamaiti. Manuia le Aso Sa o le fanau i lo tatou atunuu i soo se tafa o le lalolagi ma Samoa.