Ua tu’u avanoa le faamasinoga i leoleo mo le se lua vaiaso e faamautū ai moliaga o le ta’ita’i o le itu agai ma le vaega e Puipuia Aiā Tatau a Tagata, susuga Tuilaepa L. Sailele Malielegaoi, ina ua toe vala’au moliaga fou e fā o loo tuua’ia ai Tuilaepa i le fa’asoesā ma le tau faaleaga.

O ia moliaga e mafua i ni ana saunoaga faasaga i le palemia i se fono ma tusitala le masina o Aukuso. Sa toe vala’au i le Aso Lua o le vaiaso nei ia moliaga mo le tu’uina atu o se tali a le ua molia, peita’i ona ua toe talosaga le loia a leoleo mo se avanoa e faamautū ai moliaga uma o le mafua’aga lea ua toe tolo ai le mataupu i le aso 27 o le masina nei.

E le’i mafai ona tulai le ta’ita’i o le itu aga’i i luma o le faamasinoga i le Aso Lua ona o a’afiaga i se gasegase e pei ona sa tu’uina atu e lana loia se pepa ma’i e faamaonia ai lea tulaga.