Ua tē’ena e le palemia o Niu Sila le afioga Tuisinavemaulumoto’otua Christopher Luxon se finagalo o le palemia o Samoa le susuga Laaulialemalietoa Leuatea Poalataivao Fosi Schmidt, sa ta’ua ai se mana’o o le palemia o Niu Sila e fa’atalanoa le feagaiga fa’auō a atunu’u e lua le Treaty of Friendship.

O le saunoaga a le palemia o le tatou atunu’u i le fiafia na fa’afeiloai ai le afioga Anae Arthur Anae ma lana au malaga o sui o le Pacific Justice i le Aso Gafua o le vaiaso ua mavae, sa ia fa’ailoa ai o le mana’o o le palemia o Niu Sila sa ia lē talia ona sei mae’a le palota tele o loo loma a Niu Sila ona fa’atali lea poo ai le palemia ma le faigamalo e tula’i mai.

I le lipotia ai o lea vaega o le saunoaga a le palemia o Samoa ua lipotia ai e le leitiō a Niu Sila le finagalo o le palemia o lea malo ma ia fa’ailoa ai e leai se la talanoaga ma le ta’ita’i o le tatou malo na ia faia ai sea faamatalaga.

Ua fa’aalia foi e Tuisinavemaulumoto’otua Christopher Luxon i tusitala i Niu Sila e le’o sana faamuamua lea i le taimi nei, ae o le a ono fa’atalanoa le feagaiga fa’auō na Niu Sila ma Samoa i le tausaga fou. E pei ona silafia o le malaga taualoa mai i Samoa a le palemia o Niu Sila ia Mati o le tausaga nei ma faae’e ai le suafa matai e le afio’aga o Apia, sa tē’ena ai foi e Luxon se finagalo o le palemia o Samoa sa ta’ua ai sa molimana’o i se suafa matai.

O se pepa o fa’asalalauga mai le malo i le tuana’i o lea tulaga na fa’ailoa ai e le malo e le’i molima’o le palemia o Niu Sila i se suafa matai.

I le feagaiga fa’auō i le va o atunu’u e lua ua mae’a fa’ailoa i lipoti le faamoemoe o malo e lua e faia ni talanoaga e toe silasila ai i aiaiga o le feagaiga ua 64 tausaga talu ona sainia e Samoa ma Niu Sila.