Ua fautuaina e le ta’ita’i o le malo le paia maualuga o le afio’aga o Leauvaa ina ia faia se latou sainigālima e faamau ai lo latou maliega ‘autasi e toe foi ile itumalo faapalota o Gaga’emauga numera tasi sa palota ai i tausaga e tele ua mavae, a’o le’i suia ia Sagaga 3 ona o suiga o le tulafono o faiga palota ma le fa’avae.

O le fautuaga e faia se sainigālima e mafua mai ina ua finagalo malilie le nu’u i le autū na āfea ai e le malo mo se feiloa’iga i le fa’aiuga o le vaiaso ua tuana’i, sa fa’ailoa ai le fuafuaga a le malo lea sa folasia e le afioga i le palemia susuga, Laaulialemalietoa Leuatea Polataivao Fosi Schmidt.

Sa fa’ailoa ai foi e le palemia le fuafuaga e faafo’i le afio’aga o Salamumu i le itumalo o Gaga’emauga 2. O suiga o le tulafono o faiga palota ina ua ave’esea itumalo fa’aalalafaga lea sa aofia ai na o nu’u mavae ae suia i itumalo fa’apalota, na avea ai Salamumu ma se tasi o afio’aga i le itumalo palota o Safata 1.

O loo tapena e le malo ni teuteuga e tu’uina atu i le palemene mo le toe fa’afoi o ia afio’aga i itumalo palota sa iai muamua i Gaga’emauga tasi ma Gaga’emauga 2.

O loo iai le fa’amoemoe o le malo e feiloa’i atu i le paia maualuga o le afio’aga o Salamumu e fa’ailoa iai lea fuafuaga.