O Michael Tanumafili Von Reiche 52 tausaga o lona matua o se tamā ua faasalaina e nofo va’ava’aia mo le 16 masina, ma le selau itula e galue fua ai mo le lelei o tagata lautele. Ua poloa’ina foi na te totogi le lima selau tālā o le totogi o le fa’amasinoga ina ua fa’amaonia ona moliaga e 4 o le faao’olima poo le common assault ma le moliaga e tasi o lona umia o se aupega mata’utia.

O lona lē usita’ia o lea aiaiga o lona fa’asalaga e mafai ai ona nofosala i le falepuipui mo le 3 masina. E 27 moliaga sa tu’uaia ai lea tamā ma sa aofia ai ma ni moliaga e 22 o gaioiga taufai’aiga peita’i sa ia tē’ena uma ia moliaga ma taunu’u ai le laulau o fa’atonu i le latou i’uga e lē fa’amaonia.

O moliaga e lima ua faia iai le fa’asalaga sa ioeina e lē ua molia, ma o se tinā sa la nonofo ma lana tama teine sa a’afia ai.

I se isi o tala mai le faamasinoga maualuga, o le aso 4 o le masina fou o Novema e su’esu’e ai le talosaga a Michael Gibson o se tagatanu’u o Niu Sila ina ia faia se fetu’una’iga i aiaiga o loo tatala ai i tua, ona e fia malaga i Aotearoa.

O lea taule’ale’a o loo molia i lona fa’aulufale ma le umia o fuala’au faasāina o le maruana. O ia nakoti na maua o fafao mai i se fagu ta’ele shampoo na maua i sa’ili’iliga a le Ofisa o le Tiute i le falemeli i Apia.

E lei tu’uina atu se tali a lē ua molia i moliaga ona o loo tālia lana talosaga pe talia e le faamasinoga lona malaga ese ma Samoa.

O loo tē’ena e loia a leoleo lea talosaga ona e iai popolega e lē toe foi mai Michael ona e leai ni ona sootaga i Samoa.