A’o lumanai le masina fou o Novema o loo fuafua e fa’asalalau ai tauofoga mo ni kamupani e galulue e fausia le galuega o fa’atanoa vai tetele i Alaoa i le tau e silia i le 100 miliona tālā Amerika, o se fa’aaliga tele e ta’ua o le Business Opportunities Fair a le faletupe o atina’e o Asia sa faia i le atunu’u o Filipaina, sa fa’alauiloa ai tapenaga a le malo o Samoa e tauala mai i le Matagaluega o Galuega Tetele a le malo mo le fausia o ia faatanoa.

O se avanoa e pei ona fa’ailoa e le Matagaluega o Galuega tetele ma fela’ua’iga a lo tatou malo sa molimauina ai e kamupani ma konekarate tetele i fafo vaega uma ua tapena mo lea galuega tele.

O sui o lea Matagaluega sa malaga ai i lea fa’aaliga i le fuafuaga e fa’alauiloa atu ai tulaga ua faataoto ao lumanai le fausia o ia fa’atanoa vai tetele, o le a mafai ona taofia ai le toe aafia o nofoaga tulata i le vaitafe o le vaisigano i lōlōga, ae fa’amaopoopo ai foi le suavai mo le gaosia o le eletise faapea le suavai taumafa mo se vaega tele o nu’u ma afio’aga tau lalata i le vaitafe o le vaisigano.

O loo faatupe e le Faletupe o Atina’e o Asia lea galuega ma le Ireland Trust Fund, fa’apea ma le sao o le malo o Samoa.