Joseph Parker vs Shawndell Winters - photo by Matchroom Boxing USA
samoa

Viia la malo o Parker ia Shawndell Winter

walking Samoans

Tusia: Afoa Seti Afoa

E matagofie ma viia le fusuaga a Lupesoliai Joseph Parker i le po o le Aso Toonai i Frisco, Texas na fusu ai ma Shawndell Winters. Na manumalo Parker i le taamilosaga 5 ina ua taofia e le laufali le fusuaga.

E matuā maai le fusu a Parker mai le amataga, na faatautu’i ma Winters i taamilosaga uma. E faalua ona pa’ū Winters mai tu’i malolosi a Parker ae na lavea foi ma Parker i lima o Winters, a’o le iuga e lei taumateina seia oo i le taimi na uma ai le fusuaga i le taamilosaga lona lima. O le taamilosaga lea na pa’ū ai Winters i tu’i sosoo a Parker, ma taofia ai loa e le laufali le fusuaga. Na mamā lelei le kilivaina o tu’i eseese na lavea ai le Amerika. 

E sa’o le faaiuga a le laufali auā o le mea e sosoo ai o le oti moni loa o Winters i totonu o le maea, pe ana toe tuu mai e le laufali e faaauau le fusuaga. 

Mai le taamilosaga amata na vaaia ai le finau malosi o Parker e tuliloa Winters i totonu o le maea. Na vaaia le mamafa o tu’i a Parker i le tino o Winters. 

O se taimi lelei tele mo Lupesoliai auā na vaaia foi le mamafa o lana mānava ona o le vevela o le po. Na faapea foi ona taumafai le Amerika e faasao atu foi ana ia osofaiga atu ia Parker, ae o le tele o taimi na’o le talitali lava e Winters o tu’i a Parker. 

O le taamilosaga lona lua na faalele ai e Parker le tele o tu’i masau. Ae na’o le tasi le tu’i lelei na sao, o le taumatau na maua ai autaliga o Winters. O le tele o taimi na fusu ai i totonu, o iinā na maua ai ‘ai a Winters. E pau foi lea o lona alofaga mai lima uumi o Parker.

O le taamilosaga tolu lea na sao ai le taumatau o Parker na lavea lelei Winters ma pa’ū ai. Na to’a fuafuaga a Parker e lei soona alu e faauma loa Winters. O le logo na laveai ia Winters ina ua toe tu mai i luga mai le faitauga o upu. 

O le taamilosaga lona fa na lavea ai Parker i le agavale a Winters. Na ta’e ai ma lona mata taumatau. E lelei tele le faasoa a Winters i le taamilosaga lea, o le faitau a nisi na manumalo Winters i le taamilosaga lona fa. 

Ona oo ai lea i le taamilosaga lona lima o le fusuaga. Na vaaia ai foi ua lalata le iuga mo Winters. E ui na faatautu’i le Amerika ae na manino foi e lei lava ana tapenaga mo le fusuaga. 

E lei iai se tali a Winters i tu’i ma so’a a Parker. Na tau lelei le tu’i a Parker ile auvae o Winters ma teteva ai le tutu a ona vae, na toe sosoo atu ai ma le isi tui ma palasi atu ai agai i tua, peitai, na toe maua lava e le isi foi tu’i a Parker le auvae o Winters ae lei pasasa i lalo lona tua, lea na toeitiiti ai lava palasi i fafo ma le maea. Na taofia ai e le laufali le fusuaga, o le faaiuga sa’o foi lea. 

I le faaiuga o le fusuaga na tali ai Parker ua oo i le taimi e saili ai se tasi i le Top-10 mo le fusuaga e sosoo ai. Na ia ta’ua Dereck Chisora, Andy Ruiz Jr, ma Aleksander Usyk. Ae e pei o loo faamuamua ia Parker le igoa o Usyk mo le fusuaga e sosoo ai mo ia. 

Viia la malo o Parker ia Shawndell Winter
Click to comment

Leave a Reply

Your email address will not be published. Required fields are marked *

To Top