samoa

Toe lu’i e Kolani le faaiuga o le fasioti tagata faamoemoeina

Sa’u Justina Sa’u ua maliu
walking Samoans

O le vaiaso lenei na faatulaga mai ai e le faamasino o le faamasinoga maualuga i Apia, Niava Mata Tuatagaloa, le tolaulauga o isi moliaga o le alii o Kolani Junior Lam, ua faamaonia e le faamasinoga e ese mai i le moliaga autu o le fasioti tagata faamoemoeina.

E manatua pea e le atunuu le mataupu lenei, ona o le tasi lea o faalavelave uigaese, e faatatau i sauaga matautia faasaga i tamaitai. O le uigaese foi, lea na fasiotia ai i aao o lē ua faamaonia lana soligatulafono, o le toalua faaipoipo o lē ua maliu.

O moliaga o le fasioti tagata faamoemoeina, e soloatoa i le falepuipui, o isi moliaga na faamaonia e aofia ai le faalavelave i suesuega a leoleo, ma le faaoomanu’a. O moliaga la ia e lua, lea na faatulaga e lau lona faasalaga i le vaiaso nei.

Peitai o lea ua faamalumalu mai le toe lu’i e Kolani o le faaiuga a le faamasinoga faasaga ia te ia. 

O le vaiaso lenei ua faatulaga e toe fofoga ai i luma o le faamasinoga maualuga le lu’i a Kolani ona faatulaga ai lea o le aso o lana apili. E pei lava ona masani ai, e faatali seia oo mai la faamasino mai fafo, latou te faafoeina le iloiloga lea e galulue faatasi ai ma nisi o Faamasino Samoa.

O le toe lu’i e Kolani o le faaiuga a le faamasinoga, o loo atagia ai le finauina pea e Kolani, o lona sa’o ma le atoatoa, o le maliu o lona toalua, Sa’u Justina Sa’u, na te lei fasiotia, ae na ala ona maliu ona ua pule i lona ola.

Peitai e lē o le finagalo lea o le tamaitai faamasino afioaga ia Niava, ina ua mae’a ona fofoga molimau ma tuuina atu i le faamasinoga isi mau e faamaonia ai le moliaga o le fasioti tagata faamoemoeina a Kolani i lona toalua.

O le tele o mau ma molimau, na faamalieina ai le faamasino o le fasioti tagata faamoemoeina, ma na faaaogā ona lima e titina ai le ua o lona toalua. 

O isi uma ana mau e faapea, na toe pule Justina i lona ola, e faaaogā ai le maea, e masani ona tautau ai le mop e faamamā ai le latou fale, e sisi ai lona ua i lalo o le lala o le laau o le vineka, e lei taliaina e le Faamasino.

E lei faamanino mai poo ā tonu vaega o le faaiuga a le faamasinoga o le a faasaga i ai le lu’i a le alii o Kolani Junior Lam, ona e taofiofi i le ono liki mai i tua o faamatalaga e na o le faaamasino e tatau ona ia silafia.

Ae ina ua fesiligia se tasi o le aiga o Sa’u Justina Sa’u, i le apili lea ua toe apili ai e Kolani le faaiuga a le faamasinoga, na ia faaalia manino o lana lava lena aiātatau ae e iai lona talitonuga e ma’imau le taimi, e leai ni ana mau malolosi e manumalo ai i le apili.

“O lo’u tina ma lo’u aiga i le taimi lenei, ua move on, o le mea sili ua faamaonia e le faamasinoga maualuga, o ia lava na nofo ma titina si o’u tuafafine, alu ane la, e tali i lana mea na fai, ae lē o le finau vale, o le mea moni lava na sa tupu, e fiu lava e pepelo, o le faaiuga lava lena.”

A’o faagasolo le suesuega o le matapu e le faamasinoga maualuga, na matauina le faitau pea o le Tusi Paia a Kolani i le taimi atoa o lona faamasinoga. 

O Kolani foi lea na amata mai ai le isi itu o le tulafono e lei silafia lautele, o le talosagaina lea na o le faamasino e toatasi e suesueina lana mataupu e aunoa ma faatonu, poo members of the jury.

Tusia: Ame Sene

Toe lu’i e Kolani le faaiuga o le fasioti tagata faamoemoeina
Click to comment

Leave a Reply

Your email address will not be published. Required fields are marked *

To Top