Sir Gordon Tietjens – Faiaoga o le Manu Samoa Sevens
Taaloga

Telē le Gau o le Iuni Lakapi pe afai ae faamalolo Sir Gordon Tietjens

Sir Gordon Tietjens – Faiaoga o le Manu Samoa Sevens

Tusia: Sioeli Alofaifo

Talu mai ona filifili ai e le Iuni Lakapi a Samoa le alii papalagi mai Niu Sila ia Sir Gordon Tietjens e avea ma faiaoga o le ‘au taitoafitu a le Manu Samoa mai le 4 tausaga talu ai, e lei siamupini lava le ‘au taitoafitu a le Manu Samoa i se vae o le taitoafitu a le lalolagi, ae ua foliga mai o loo agai pea i lalo le tulaga o le ‘au taitoafitu a le atunuu i le faatulagaina mai o ‘au taitoafitu a le lalolagi i le taimi lenei.

Ua tele faitioga a le atunuu e faatatau lea i le tuai ona faia ai o se faaiuga a le Iuni Lakapi ia Sir Gordon Tietjens. O nisi o faitioga i luga o le social media o loo ta’ua ai, ua leva ona tatau na faia i ai se faaiuga a le Iuni Lakapi, ona o le palalū ai o taumafaiga a le ‘au a le atunuu.

Fai mai nisi o faitioga, ana faapea o se Samoa lea e faiaoga i le taimi lenei, ua leva foi ona fafo ai ma le maafala i le pulega o le Iuni Lakapi.

O le fonotaga foi a le autusitala ma le pulega o le ‘au taitoafitu talu ai nei, na fesiligia ai e le autusitala le alii faiaoga, pe ua lē alagatatau ona faamavae mai loa peitai na malosi le tali a Tietjens ma ia ta’ua ai, o loo iai lana galuega o loo fai i le ‘au a le atunuu i le taimi lenei.

Peitai e lē o gūgū le Iuni Lakapi a le atunuu e faatatau i lenei mataupu, o se feiloaiga a le tatou nusipepa ma le Ofisa Sili o le Iuni Lakapi ia Faleomavaega Vincent Fepuleai na faamanino mai ai, le telē o le gau o le Iuni Lakapi a Samoa pe afai ae vave ona faamuta le konekarate a le alii faiaoga i le taimi lenei a’o lei mae’a ai le 4 tausaga o lana konekarate na saini ai ma le Iuni Lakapi a Samoa mai le amataga.

Saunoa Fepuleai, na agai lava le Iuni Lakapi ma aumai le faiaoga numera tasi a le lalolagi ma le manatu maualuga o le Iuni Lakapi a le atunuu, o le a tulai mai ai le ‘au a le atunuu i se tulaga lelei, peitai, e foliga mai e oo mai i le taimi lenei, e lē o iai lava se tulaga lelei o iai le ‘au taitoafitu a le Manu Samoa i lalo o le taitaiga a le alii faiaoga ia Sir Gordon Tietjens.

Ta’ua e Faleomavaega, o se tasi lenei o tulaga na matuā iloilo lelei e le pule (agent) o Tietjens i Niu Sila i le taimi na saini ai le konekarate a Tietjens ma le Iuni Lakapi a Samoa.

Ona o popolega foi sa iai Sir Gordon Tietjens i lea taimi, i le tasi o le tausaga pe lua tausaga ae tuli ai e le Iuni Lakapi a Samoa e pei o faiaoga sa iai muamua.

Afai la e tuli ai e le Iuni Lakapi a Samoa Sir Gordon Tietjens i le taimi lenei a’o lei mae’a ai le taimi o lana konekarate, o lona uiga e tatau la i le Iuni Lakapi a Samoa ona totogi pea Tietjens seia vagana ua mae’a ai le taimi o lana konekarate lea ua faamoemoe e tatau ona mae’a ai i le faaiuga o le tausaga lenei. Saunoa Faleomavaega, e sili atu i le Iuni Lakapi ona totogi pea seleni ia Tietjens i le taimi lenei a’o lea e faia ai sana galuega mo le Iuni Lakapi, nai loa le faamae’a ai o lana konekarate ona leai lea o sana galuega e toe faia, ae o le a totogi pea le vaega o totoe ai o lana konakarate.

Na ta’ua foi e le Ofisa Sili, o loo malamalama lelei foi a le Komiti Faafoe o le Iuni Lakapi a le atunuu i le tulaga faaletonu o iai nei le ‘au taitoafitu a le Manu Samoa i lalo o le pulega a Sir Gordon Tietjens. O loo faatali nei le Iuni Lakapi i le taimi e mae’a ai lea konekarate ona faatofā aloaia ai lea ia Sir Gordon Tietjens.

O loo faamauina foi, o le faiaoga aupito sili lenei ona taugata tele pe telē lona totogi mo le ‘au taitoafitu a le Manu Samoa faatusa atu i faiaoga sa iai muamua, peitai o Sir Gordon Tietjens, e lē o mafai ona nofomau ai i totonu o Samoa, ae o loo aumau pea i totonu o Niu Sila, e faatoā malaga mai lava i Samoa pe a latalata i le taimi e tapena ai le ‘au taitoafitu a le atunuu mo taamilosaga taitoafitu a le IRB. E lē gata foi i lea, ae ua faamauina, o se faiaoga muamua lenei ua tele ina sui soo lana pulega talu ona pale mai i le tofiga e faiaoga ai mo le ‘au taitoafitu a le Manu Samoa.

Telē le Gau o le Iuni Lakapi pe afai ae faamalolo Sir Gordon Tietjens
Click to comment

Leave a Reply

Your email address will not be published. Required fields are marked *

To Top