Ausetalia

Taulia le tautigā o le ausiva a le Nuholani Keiki Dancers

Ausiva atoa a le Nuholani Keiki Dancers
Ausiva atoa a le Nuholani Keiki Dancers

E lei ma’umauina le taimi na masii mamao atu ai le ausiva a Melepone, auā na faaauau lava a latou faafiafiaga ma tapenaga sa fuafua atu mo le Pasifika Festival i Aukilani Niu Sila lea na lē taunuu ona o le CoVid-19.

E ui lava sa lei taunuu le Festival peitai na faapea ona faafiafia le Nuholani Keiki i le Hawaiian pop-up luau & hula show (West Auckland), lea na sikuea ai nisi o fale’aiga na fuafua ma tapena mo le Pasifika Festival, na taumamafa ma laulelei ai le aumaimoa.  


Faaalia pea foliga fiafia o le ausiva ale Nuholani Keiki Dancers mai Melepone tusa pe ua cancel le Pasifka Festival na malaga atu ai (photo by Gabrielle)

Na toe fetuunai fuafuaga a le aumalaga ina ua lē faataunuuina le Pasefika Festival. O le Aso Faraile 13 na faafiafia ai i le aoga a Grey Lynn Primary School. 

O le aso lona lua na fuafua mo le Pasifika Festival lea na lē taunuu ae na faatasi atu ai i le Hawaiian pop-up luau & hula show, ae o le aso lona 3 na faia ai latou pu’egaata, ma le Aso Gafua lea na auai atu ai i le St Joseph’s School assembly i Grey Lynn.

O faafiafiaga a le ausiva na sisiva ai i siva Samoa, Cook Island, Tahiti ma isi siva faapolenisia. Ua tele tomai o nei alo ma fanau Pasefika e i totonu o lenei ausiva ona o le tele o faamoemoe ua auai atu i ai i totonu o Melepone aemaise le latou malaga faagalo gata na ulufale ai i Hawaii i le tausaga e 2018. 

O iina na a’oa’oina mai ai le tele o tu ma aganuu faa-Pasefika aemaise le faaosofia o i latou e faatāua le siva ma a’oa’o le aganuu faa-Pasefika. O le tausaga e 2015 na amataina ai lenei ausiva i Melepone.

Ua faamoemoe o le a tele foi ni lesona o le a a’oa’oina mai a’o femalagaa’i solo ai i nisi o a’oga i Niu Sila i lenei vaiaso. E ui lava la ina lē faataunuuina le faamoemoe tele o le Pasifika Festival na malaga atu ai i Niu Sila ae lē o malolo ai le pisi o le ausiva e tali valaaulia, ma ua atili faateleina ai le fausia o le lototetele o teineiti e faafiafia i luma o tagata e toatele.

E fefiloi uma le ausiva, o nisi o Samoa uma e tupuga mai ai mātua, o nisi o afakasi Samoa ma Palagi faapea foi afakasi Fiti o nisi o afakasi Tonga. Ua iai le faamoemoe e toe taliu mai le ausiva i Melepone i se aso o le vaiaso nei.

Tusia: Rosa Tamala Fiu

Click to comment

Leave a Reply

Your email address will not be published. Required fields are marked *

To Top