Geoff Muliaga Brown a o taofia ai ile fale mai i Aukilani ona ole aafia ile Covid-19
samoa

Faalua na teena le faiga ole siaki ole Covid-19 mo Geoff Muliaga Brown

Geoff Muliaga Brown a o taofia ai ile fale mai i Aukilani ona ole aafia ile Covid-19

Na taua e le tama o se tasi ole fanau aoga ile kolisi o Marist College le teena faalua o ia mai le fai o sana siaki ole Covid-19 faatoa mafai na fai ma faamaonia ai le maua o ia ile faamai.

Taua e Geoff Muliaga Brown, pe tusa ole vaiaso talu ona ia auai atu ise faatasiga ale aoga ae amata loa ona ia lagona ua mai.

Ose ata video mai le potu ile falemai i Aukilani na taofia ai Muliaga na ia taua ai, sa logo tala ile aafia ai o ni faiaoga ile aoga a lona afafaine, lea na mafua ai le taumafai e fai sana siaki peitai, sa faafaigata lana mataupu.

Fai mai Muliaga e faalua na alu e fai lana siaki i totonu ole 4 aso peitai e lei mafai ona o nisi o aiaiga e aofia ai na o tagata lea na toe foi mai i atunuu mamao.

Saunoa Muliaga, o aso na sosoo ane ai na taoto ai loa ile fale ina ua amata ona faateteleina auga ole mai.

Sa ia valaau ile Healthline ma tau iai auga o lona mai ma oo ai lava ina faia lana siaki. Fai mai Muliaga i lana molimau, e le o se mai e fia mai ai sesi. E fai si tigaina ona auga.

A o faatali se tali mai suesuega, na maitauina ai e Muliaga le amata ona iai ose suiga tele i lana manava ma ua amata ai ona popole.

Sa ia toe valaau ile Healthline ma tau iai ua uma ona faia lana siaki ae lei maua mai lava se tali. Ole taimi lea ua amata ona tiga tutui lona tua ma ona itu atoa ai male tau puni o lana manava ma faatonuina ai loa o ia e agai loa ile falemai i Aukilani.

Ole siaki muamua na lei maua ai se siama ole Covid-19 peitai o isi suesuega mulimuli ane na faamaonia ai loa lona aafia.

Na taua e Muliaga, o ia ua fia maua le malosi ma na te le fia faapopoleina isi tagata.

Ole taimi nei ua amata ona faasolosolo manuia Muliaga peitai o lona faanoanoaga ona ole faafaigata ona fai siaki ole faamai.

E 48 tagata ua faamaonia le aafia ile coronavirus mai le kolisi o Marist College.

Ole taimi nei ua iai suiga ua faia e le soifua maloloina e faafaigofie ai ona faia siaki a i latou ua maua i auga ole Covid-19.

Taua e se tasi o matua ole kolisi ise lipoti le auina atu e le aoga o faamalosiau ma tala lata mai ole faamai i matua ole aoga i aso taitasi.

Ole aoauli nei na taua ai e le malo le aafia ai ole toa 708 o tagata Niu Sila ile Covid-19.

Afai o e lagona ua e aafia i auga ole faamai, valaau loa le Healthline ile 0800 611 116.

Faalua na teena le faiga ole siaki ole Covid-19 mo Geoff Muliaga Brown
Click to comment

Leave a Reply

Your email address will not be published. Required fields are marked *

To Top