Ausetalia

Faailoga le 70 tausaga afioga ia Galumalemana Naea Harry Timoteo

Afioga i le aloalii ia Galumalemana Naea Harry Timoteo ma le faletua ia Wendy, ma lona uso ia Maualaivao faapea le nofoaalo, fanau a fanau ma aiga, o loo feagai ma tafaoga i lona 70 tausaga
walking Samoans

O le aso 1 o Mati i le 2020, na alalaga fiafia ai alo ma fanau a le afioga i le aloalii ia Galumalemana Naea Harry Timoteo ina ua faamanuia le Atua ma foai tausaga e 70 i le soifua o si o latou tamā. Na matuai faate’ia ma faafiafiaina ai o ia i tapenaga uma a le fanau na faalilolilo ai se latou tafaoga ia Ivy & Eve apartments, South Brisbane.

O se tamalii ua loa lana tautua matavela i le aai o Kuiniselani ua oo atu lava i Samoa e ala i ana auaunaga o loo fai ma faamāmā avega i tagata Samoa e le gata o le faleoloa o faatauina ai le tele o oloa mai Samoa, DVDs, CDs, ma nisi oloa, a’o isi ana tautua ua lauiloa e le toatele lea o loo galulue punoua’i ai ma le faletua ia Wendy Apu Timoteo faapea le nofoaalo ia Diane ma Mika Nansen ma le aiga. O nai ona alo ia Kathy & Afioa’e; Diane ma Mika Nansen; Ese ma Ray; o Nive foi; ma si ona atalii ia Mason. E to’a 14 grandchildren, ae to’a 3 great-grandchildren, na auai uma i lea fiafia e faamanatu ai lona aso soifua.  O le afioga i le aloalii ia Galumalemana Harry Timoteo o ona alalafaga i Samoa o Eva ma Malie. Na amataina mai le tautua a lenei tamalii ma le aiga i Brisbane i le tausaga e 2003, e aofia ai le Enchiro Freight, Enchiro Laei ma le Enchiro Jet Screen, ua tele la latou fesoasoani i le lagolagoina o soo se faamoemoe, o mafutaga, faalapotopotoga, ekalesia ma nisi tautua, aemaise ai tagata lautele ua fai lava ma vaafaa’ola i le tele o tausaga ma aso faisoo.

E tusa ma le $8,000 le aofai atoa o le ‘ula tupe na matuai ofo ai le toeaina ina ua sauni atu e feula lana keke, ae onoono mai i totonu o le pusa lea na matuai sisina ai lona afu i le tauseiina mai i fafo a’o maimoa le auvalaaulia, o le foai tupe o le meaalofa a nai ona alo e faimeaalofa ai mo ia, ina ua aulia nei tausaga e tele o lona soifua ae lē gata i lea o se faafetai tele ona o se tamā sa galue ma o loo galue malosi pea mo le aiga aemaise nai ona alo ma a latou fanau ma fanau a fanau. 

Na amataina le polokalame faapitoa o le aso soifua o Naea i le Aso Faraile e ala i le kukaina e aiga uma poo nai ona alo ma a latou fanau o pizza ma faia iai se tauvaga ae faamasino faapitoa le afioga i le aloalii ia Galumalemana Naea. O le Aso Toonai ina ua maea le malu taeao na feagai ma taaloga (golf) ae faaiu i Eat Street mo le taumafataga o le afiafi.

O le taeao o le Aso Sa na faia ai se taumafataga ma o le aso lea na faaofo ai le toeaina i nisi o tapenaga a le fanau ma ana meaalofa na tuuina aloaia ai ma se faafetai tele a le fanau ona o le galue punouai o lenei tamā ua faaeaina ai ma ola fiafia nai ona alo ma a latou fanau. E ui o se manaoga o si ana fanau ua tatau ona litaea ae malolo loa ma tafao, peitai, o lona ia manatu o loo iai pea lona naunautaiga e tautua ai ma faia lana tautua a’o maua lona malosi. O le tatalo ia agalelei le Tamā Faalelagi ma saga tului nisi tausaga se tele i lou soifua Galumalemana Harry, auā lau auaunaga i le aiga ma le atunuu. Ia sili ona faafualoa pea lou soifua auā mafutaga ma le faletua faapea le nofoaalo, fanau ma fanau a fanau aemaise lou agalelei i soo se tasi. O alofaaga ma faamanuiaga mo oe le tamā peleina mai lau manamea o Wendy Apu Timoteo faapea le fanau ma o latou taitoalua ma fanau.

Alofaaga e auina atu ia Kathy & Afioae Maiava; Diane & Mika Nansen; Ese & Ray Maninoa; Mason; faapea Niveh. E le galo alofaaga mai au Grandkids: Enaid & Junior Fepuleai; Malachi & Regena; Jade & Desmond; Rowena & Mori; Oceania & Salu ;Tatyana; Jonjae ; Loisa; Lotu; Harry; Genesis; Jazaiah; Mahalia; Lani; Mason Jnr, faapea Great Grandkids Bellè; Rose; Mika Jnr. Ia manuia tele le laasia ai o nei tausaga e 70 ua e aulia ma le manuia mai faafetaia pea le Atua.

Faailoga le 70 tausaga afioga ia Galumalemana Naea Harry Timoteo
Click to comment

Leave a Reply

Your email address will not be published. Required fields are marked *

To Top