walking Samoans
samoa

Faaauau le nofo a Taliulu Vainiu Te’o i le Suafa Leniu o Laulii

Leniu Vainiu Te’o ma lona faletua ia Peta faapea le tofa ia Toala Magalogo

Ua teena e le Faamasinoga o talosaga toe iloilo le talosaga a itu talosaga e lima, ina ia toe iloiloina le faaiuga a le Faamasinoga i le 2014, lea na tofia ai Taliulu Vainiu Te’o i le Suafa Leniu o Laulii. O le lua vaiaso talu ai na tuuina mai ai le faaiuga lea a le Faamasinoga o talosaga toe iloilo i le mataupu lenei. 

O itu faamasinoga i lenei mataupu e lima itu Talosaga, ae tasi le itu Tetee lea o loo tulai mai ai lē o loo faasaga i ai le mataupu o ia lea o loo nofo mai i le suafa Leniu. O ia itu faamasinoga o suli lava o le aiga, peitai i le finauina o lenei mataupu i le tausaga 1959, lea sa faamaonia ai le pule o le suafa Leniu e aofia ai le itu Tagi ma le itu Tetee.

O loo faailoa i le talosaga sa tuuina atu e itu talosaga mafuaaga e pei ona mananao ai e soloia le nofo a Taiulu Vainiu Te’o, ona o le mananao e maua se feiloaiga, e lē gata i lea o tuua’iga e faapea e sese auala na logo ai le Aiga. Sa tuua’ia foi le itu i faasalalauga o feiloaiga, aemaise foi tuua’iga i le resitara.

O ia tuua’iga sa faapea mai le faamasinoga, o le tulaga e faapea ia maua se feiloaiga, e faigata ona talitonu i ai le Faamasinoga ona o Talaaga o le finauga o le suafa Leniu, mai lava i le 1920 lea ua 100 nei tausaga, e iu mai lava i le Faamasinoga.

O tuua’iga foi lea sa faasaga i le Resitara, faapea faasalalauga na ta’ua e le Faamasinoga e tautuua’i, ae lē fia feiloai. Na maua sa talo le feiloaiga e le itu tetee e lei auai atu itu talosaga, e faapea foi i le feiloaiga na talo e itu Talosaga e lei auai le itu Tetee. Sa faapena foi ona talo mai le feiloaiga e le Resitara e lei auai uma atu i ai, o lea tulaga ua lē talitonuina ai e moni le naunau e fia feiloai.

Sa manino mai i le suesuega o le mataupu, o itu talosaga uma sa tulai mai o latou o sui i faamasinoga o le 1920 faapea foi le faaiuga o le 1922 ma le 1959. O le itu tetee sa iai foi o latou sui i le faamasinoga o le 1922. O nofo i le suafa Leniu, o loo tofia mai tino o Itu Talosaga 1, 2, 3, 4 e iai Leniu Vaimasele, Leniu Avaona, ma Leniu Avamagalo.

O le Itu Tetee sa taumafai la latou nofo i le 1922 ma le 1989, peitai e lei manuia, ae i le 1989 sa maua ai le finagalo o le itu tetee e faaauau pea le nofo a Leniu Avamagalo, ae a iu lea nofo ona tuu atu lea o le suafa i lo latou itu. Sa faaupuina o le mafuaaga lea na toe tatala ai le taofi o le itu Tetee i le 1989, ma faigofie ai loa le nofo a Leniu Avamagalo.

O le itu Talosaga 4, o loo maitauina e lei iai so latou sui i le Faamasinoga o le 1922 ma le 1959, ma e ese foi la latou finauga, o le faamautuina o lo latou aiā i le Suafa Leniu, peitai na ta’ua e le Faamasinoga ua taoto le pule o le suafa Leniu e iai le faaiuga o le 1959, ma itu e faasino tonu i ai. O lona uiga e lē tāua la latou mau lea o loo faapea mai e faatautee le faaiuga o le 2014, ma mau na o latou tuuina mai i le suesuega.

O le faaiuga a le faamasinoga o loo atagia ai e lē mafai e le faasologa pitotasi o nofo i le tino o Itu Talosaga 1, 2, 3, 4, ona aveesea le tasi itu o le Aiga Sa Leniu, o loo iai i le faaiuga o le 1920 ma faamautuina i le faaiuga o le 1959, e aofia ai le pule o le suafa Leniu lea o loo tulai mai ai le Itu Tetee. 

O le ala lea e ui lava ina finau mai e teena le nofo a Taliulu Vainiu Te’o, e mautu le talitonuga o le faamasinoga ua tatau ona pale mai se isi o lea itu o le aiga i le suafa Leniu.

O le faaiuga ua faatumauina le faaiuga o le aso 14 o Fepuari 2014 LC.1755 P5-P14 lea na tofia ai Taliulu Vainiu Te’o i le suafa Leniu o Laulii.

Sa faailoa e Leniu i le Samoa Times o lea ua mae’a faalelei lo latou aiga, ina ua foi atu i fanua, e leai se mea o toe gase, o lona foi tofi i le matai ma le tausiga o le aiga ma le nuu, o loo faaauauina lava lea tautua. “Ia o ai lava le tagata o toe ita ia te a’u o ia lava lena, ae o le nofolelei ma le manuia o le aiga e mafua ina ua tutū ma loto faatasi suli ma tagata uma.”

Itu Faamasinoga:

Itu Talosaga 1: Fanene Emaline Leniu Fonoti, Leota Suatele Manusegi, Niuafolau Dionne Fonoti, Tialino Taualai Fonoti, Laauli Leniu Fonoti.

Itu talosaga 2: Fuatimau Maumea Leniu, Tofaeono Vui Faatali, Luafalealo Tony Leniu, Toloa Topele Leniu, Leota Avaona Leniu, Niuafolau Muliaga, Leavasa Solomona, Auseugaefa Falanisisi Bell, Vaimauga Timani Leniu, Seiuli Talaivi, Alesi Taofiga Bell, Lina Falesiva Leniu, Ua’i Fanene Leniu, Feagai Leniu, Sevao Fanene, Lesina Pauli, Lepae Mua Lafaele, Siala Alesana, Afoa Mose, Tuinanau Toloa.

Itu Talosaga 3: Amituanai Iosua Matuu, Samia Ualesi Leniu, Samia Tautai Matuu, Faalele Faatupunuu Tuanima, Faleiva Faatupunuu, Lulusaito Matuu, Liliu Faatupunuu Fanolua, Fotu Matuu.

Itu Talosaga 4: Fausia Taunese Fausia, Maposua Ainofu, Maposua Ierome, Hana Siua, Voughnharmon Tagaloa Talapa, Faimafili Fausia, Fausia Peni, Sitaleti Fausia, Matele Mataiumu.

Itu Talosaga 5: Pauga Talalelei Pauga, Leota Fuga Pauga, Pauga Etisone Pauga, Ale Taala Komiti, Samalaulu Niupulusu, Talomaleava Finauga Pauga, Seiuli Fitutasi Pauga, Seiuli Anthony Pauga, Masae Saili, Avefua Manoa, Taeasina Ruta Pauga, Elena Auelua.

Itu Tetee: Leniu Taliulu Vainiu Te’o, Tuimatafanua Taito Galu, Taito Sonny, Fuatimau Harold, Taito Moana, Tuifaleula Sione, Taito Carol, Faasalafa Mutimuti, Tuialii Tavita, Tufaleula Fa, Leitufia Ekeroma, Tuautu Molesi, Vaimauga Maalona, Matthew Leniu, Fainuu Vaea, Loretta Nauer, Soteria Afoa, Afoa Faafetai, Pauga Tofi, Fetaia’i Siatupue, Vainiu Jr Leniu, Fanene Ofisa, Ana Tuifaleula, Lilino Tau.

Laulau a le Faamasinoga: Fepulea’i Letufuga Attila M. Ropati, Muipola Iosefo Mulipola, Moananu Tuasivi Setu. 

Tusia: Maina Vai

Click to comment

Leave a Reply

Your email address will not be published. Required fields are marked *

To Top