samoa

Aua ne’i toe aumaia ni papālagi e faiaoga i le Manu Samoa

Fuimaono Titimaea Tafua – Faiaoga tuai a le Manu Samoa 15
walking Samoans

O loo tālia pea le taimi e toe faasalalau ai e le Iuni Lakapi a le atunuu se faiaoga fou mo le Manu Samoa 15 auā le tapena mamao atu mo le isi taamilosaga o le Ipu a le lalolagi i le tausaga e 2023 i totonu o Farani. O le vaiaso na tea nei, na toe filifilia ai Faleomavaega Vincent Fepuleai e toe faaauau ona galue i le tofiga o le Ofisa Sili mo le Iuni Lakapi a Samoa. 

O lea ua sauni nei le Iuni Lakapi e saili se tasi e avea ai ma pule sili i le High Performance Unit mo le lakapi a le atunuu. O lea tofiga e gafa lea ma le filifiliga o faiaoga mo aulakapi taitasi a le atunuu. E mae’a loa le filifiliga o se HPU Manager ona faatoā sosoo ai lea ma le filifiliga o se faiaoga fou mo le Manu Samoa 15.

Na maua se avanoa e faatalanoa ai se tasi o sui tuai o le Manu Samoa 15, sa avea foi ma faiaoga o le ‘au taitoafitu a le Manu Samoa faapea le Manu Samoa 15, le Afioga ia Fuimaono Titimaea Tafua, ma ia ta’ua ai, ua lē tatau ona toe aumaia e le Iuni Lakapi se palagi e faiaoga mo aulakapi a le atunuu, ua tele tausaga e aumai ai papalagi mai atunuu e mamao, ae e lē o iai lava se suiga lelei mo aulakapi a Samoa, ua atili ai ona faaletonu faaiuga o taaloga. 

O se faataitaiga, na aumai e le Iuni Lakapi a Samoa Sir Gordon Tietjens, o le faiaoga numera tasi a le lalolagi i le taitoafitu ma le manatu o le Iuni Lakapi a Samoa, o le a sosoo ai ni siamupini mo le ‘au taitoafitu a le Manu Samoa, peitai o lea ua fa tausaga, e lei siamupini lava i se vae o le taitoafitu a le IRB, pau le tulaga o loo manuia ai Tietjens i le lakapi a Samoa, o le maua atu ai o ana tupe ae lipi ma se alu i luma o le ‘au a le atunuu. Saunoa Fuimaono, o loo iai lava tama fanau ma tamalii o le atunuu i Samoa e mafai ona o latou faia ma faiaoga  i aulakapi a Samoa ae aua ne’i toe aumaia ni palagi ma le faaletonu ai o aulakapi a le atunuu.

Na fesiligia foi Fuimaono pe toe tusi talosaga ai i le avanoa faiaoga mo le Manu Samoa 15 pe afai ae toe faasalalau ai, ae tali Fuimaono, ua uma lona taimi, e lē toe tusi talosaga foi, ae o loo iai nisi o faiaoga i totonu lava o Samoa e mafai ona avea ma faiaoga o le ‘au taitoafitu a le Manu Samoa, faapea foi le Manu Samoa 15. O le finagalo foi lea o se tasi o sui tuai o le Olo Peleki a Niu Sila faapea foi le Manu Samoa, le susuga ia Fesolai Vaaiga Tuigamalaga. Fai mai Tuigamala, e telē lava le avanoa e mafai ona faiaoga ai se tagata Samoa i le aulakapi 15 a le atunuu. O loo iai le manatu o Tuigamala, afai ae toe faasalalau lea avanoa faiaoga, e talafeagai tonu lava ma se tasi o sui tuai muamua o le Manu Samoa 15, le susuga ia Mase Mahonri Schwalger, ua sauni foi Tuigamala e tusi talosaga ai mo le avanoa o le faiaoga lagolago poo le galuega faafaufautua i le ‘au a le atunuu pe a faasalalau avanoa. 

E tutusa lelei manatu o Fuimaono ma Fesolai, mo le tulaga lelei o aulakapi a le atunuu, o loo malamalama lelei lava faiaoga Samoa i le ituaiga o pulega e faafoe ai aulakapi a le atunuu e pei o le Manu Samoa 7’s ma le Manu Samoa 15. Peitai o le tele o papālagi e na’o le omai e faiaoga i le Manu Samoa ina ia siitia ai le tulaga o a latou tusipasi ina ia mafai ona faiaoga ai i nisi o aulakapi tetele a le lalolagi, auā e maua loa le avanoa e tusi talosaga ai i ia avanoa ona faamavae mai loa lea mai aulakapi a Samoa.

Aua ne’i toe aumaia ni papālagi e faiaoga i le Manu Samoa
Click to comment

Leave a Reply

Your email address will not be published. Required fields are marked *

To Top