This slideshow requires JavaScript.

 

O le Aso Toonai talu ai, o se tasi o faaiuga o le vaiaso na tele meafai sa auai atu ai le mamalu o Samoa i Aukilani. Peitai e lei tuumāmāina ai e aiga, uo ma i latou na silafia le faamoemoe o le fanau, e pei ona taualuga i ai le latou tauvaga pese na faafoeina ele Radio Samoa.

O le tauvaga pese a le fanau, mai le vaega laiti e oo atu ile 14 tausaga le matutua sa maua lo latou avanoa e fatu mai ai ni a latou lava pese Samoa (original songs), e tauva ai i lenei tausinioga.

O se tauvaga sa faagasolo i luga o le leitio i taimi o le polokalame ale fanau i aoauli o aso taitasi mo le lima vaiaso, e lea sa faafoeina ele alii faasalalau, Seumanu Francis Ioane.

O aso taitasi o le vaiaso i taimi o polokalame a le fanau, sa faasolosolo ai ona pepese mai le fanau i pese na fatu lava e latou, ae o le Aso Faraile i vaiaso taitasi na e lima, sa faia ai le filifiliga mai palota na aumai ele mamalu o le atunuu ma iloa ai poo ai na tele ana palota, o ia foi lena sa manumalo i lena vaiaso.

O le mae‘a ai o vaiaso e lima, na taualuga ai loa ile Aso Toonai talu ai, ina ua tuufaatasia uma loa le toalima faaiu poo finalists e fai ai le latou tauvaga faaiu a‘o silasila alii faamasino sa filifilia latou te faia le faaiuga mulimuli mo lē ua sili ona matagofie lana pese na fatu e ia lava. O le hall ale Ekalesia Life Church i Manurewa sa faataunuu ai lenei faamoemoe.

E ese mai a latou pese autu o le tauvaga, ae na iai le avanoa e faalua ai pese ale tagata e filifili ai lava e ia se isi pese ua leva e na te toe peseina, ma faafiafia ai.

Ose vaaiga manaia o lea aso, ile talenia o nei fanau laiti, aemaise foi le lagolago atu a aiga auā na masii atoa atu e lē na o mātua ae o le aiga lautele ma uo. O le laulau a faamasino na filifilia ai le afioga Galumalemana Tenari Tautua, Kas Futialo, Nanai Viellani Peteru & Leuluaipouamalo Punialavaa Peteru.

E lē gata ile faatinoga o le matafaioi o ni faamasino o le tauvaga, ae sa maua foi le avanoa e faafofoga ai le aofia sa auai, a o toe pese mai e faamasino uma taitasi nisi o a latou fatuga oloo faafofoga soo ai i luga o leitio faasalalau.

Ae mole fanau e toalima na faia iai le tauvaga faaiu, e toafā tamaitai ae toatasi lava le alii na filo ai. O tamaitai nei o Kirita Leavasa, Soteria Selani Eneliko, Luica Lemi, Sally Auapaau ma si alii laitiiti e toatasi o Oweem Faamatuainu.

O le fofoga o lea aso na galulue soosoo tau‘au ai lava nisi o sui faasalalau ole Radio Samoa, le susuga Seumanu Francis Ioane male tamaitai o Salavao Masimino.

O le iuga o le tauvaga e pei ona auaufaatasi iai faamasino i lea aso, o lē na tulaga muamua, ole tamaitai o Kirita Leavasa, tulaga lua o Sally Auapaau, tulaga tolu o si alii o Oweem Faamatuainu, tulaga fā ole tamaitai o Luica Lemi, male tulaga lima ole tamaitai o Soteria Selani Eneliko. O lenei tauvaga ale fanau sa lagolagoina malosi ele Keila Records, Music Planets aemaise ai le Radio Samoa.

E tele faailoga mananaia ale fanau sa maua ai, e aofia ai le pueina fua ose lipine pese ale tamaitai ua manumalo ile fale puepese ale Keila Records, o nisi o pepa e ulufua ai i nisi o nofoaga e tafafao ai le fanau, ma isi faailoga anagata e pei o le laptop, tablet ma telefoni feaveai. E iai le talitonuga o le amataga lenei o nisi tauvaga faapea pe sili atu foi ale fanau poo ē matutua ile lumina.