Radio Samoa - 1593am » news

Malaga mai le au fai ata tifaga i Aukilani

Miriama Pomare — Fri, 06 Jan 2012 01:42:58 +0000

O le alii fai ata tifaga o Matthew Fox lea e iloa tele e le au matamata i le ata o le Lost i luga o le televise o le a malaga mai i Aukilani nei mo le pueina o se tasi o ana ata fou ua faaigoaina Emperor. O se ata e faatatau i le taimi na maea ai le taua lona lua o le lalolagi i totonu o Iapani ma o le a amata pueina vaega o lea ata i le masina nei i le pitonuu lea o Henderson. O le uluai ata tifaga tele lea ua pueina i le itu i sisifo o Aukilani i le West Auckland Facility talu ona pulea e le Auckland Council Investment mai le tausaga na tea nei.O le alii o Fox e sau foi i le ata o le Party Five ae o le ata lea o le a pueina o le a faaautu i ni faiga faapolokiki e faatusa i se mea moni na tupu i le maea ai o le taua lona lua o le lalolagi. Fai mai le sui o le council o loo nafa ma le vaaia o lea faamoemoe e le nao o le pueina o le ata e alai ona fia malaga mai le alii fai ata tifaga ae ona o le matagofie tele foi o le laufanua o le atunuu.
—————-
Ua toe vaaia le tino o David Bain i Dunedin o fai malologa ai ao lumanai ai le faalauiloaina o se tusi e faatatau i le toe faamasinoina o ia i se taimi e lei mamao atu. O David Bain e mai Dunedin ma o le 1995 na faamaonia ai i lona fasiotia o ona matua, ona tuafafine e toalua ma lona uso lea na loka ai i le falepuipui mo le 13 tausaga ae toe magalo ma faaleogaina moliaga i le 2009 ina ua toe faia le faamasinoga. O ana uo ma e masani sa o latou faamatala i le au tusitala o loo malaga atu Bain e asia aiga ma nisi o uo. O le o loo lagolago malosi i ana taumafaiga o Joe Karam lea ua ia faamaonia mai o le a iai faatasi David Bain ma se tamaitai masalo o sana paaga lea ua iai nei i le sauniga o le International Justice Conference i Perth ia Mati lea o le a faia ai se uluai sauniga faalauaitele a David Bain e tusa o le talaaga o lona olaga ma le faalavlae na tupu.
—————–
Faatalia se faamaoniga mai leoleo i Kalaiesetete e faatatau i se tino maliu o loo taua mai na maua ai i le malae vaalele i le taeao nei. .O se sooupu mai leoleo na ia taua ma faamaonia mai o loo iai leoleo i le malae vaalele i le taimi nei ae le o mafai ona faailoaina poo ai tonu le tagata lea na maua. O loo faia nei suesuega poo ai tonu le tagata ae pe na mafua foi i se a ona maliu. O loo faaauau pea faigamalaga agai atu ma le agai ese mai ma le malae vaalele i Kalaiesetete. O isi lipoti o loo taua ai o le tino maliu na maua i se tasi magaala i tala ane o le malae vaalele ae le o le malae vaalele.
—————-
Ua iai le tagata ua aia pe noanoatia foi o na o le faaaogaina o le facebook. O se faiaoga i le iunivesite i Bangladesh ua falepuipui nei mo le ono masina ina ua ia tusia ni faamatalag ai luga o lana itulau e faapea talosia ia uma le soifua o le palemia o le atunuu o Sheikh Hasina o se loia foi. O Ruhul Khandakar na lauina lona iuga ao loo aoga i Ausetalia ae na ia faia ni faamatalaga e faatatau i le taitai o le atunuu i le tausaga na tea nei. Ua maea ona toe tape ese ia faamatalaga i le taimi nei ae o Aukuso na poloaia ai e le faamasinoga e tatau ona tulai e tali ma faamalamalama le uiga o ia faamatalaga na ia faia. Ua poloaia e le faamasinoga le pulega a le iunivesite ina ia fai sa latou gaioiga i le faaiuga ua tuuina atu ma e iu ina maumau ai ma lana galuega faiaoga.
———–
1pm
E le mapu le saili fesoasoani o o tatou tagata i niusila nei mo nai aiga ma uo foi e malaga mai mai Samoa poo isi foi atunuu ae faafaigata ona talosagaina ni pemita nofomau i niusila poo ni avanoa foi e faigaluega tumau ai i le atunuu nei. Peitai o se tasi o auaunaga ua tatalaina nei ma ua amatalia lana tautua i Aukilani e le taumate o le a avea o se laveai ma se tali i faafitauli faapea o le toatele o loo saili fesoasoani i mataupu tau femalagaiga ma le aumau ai i niusila. O le Mua Pacific Ltd lea ua tatalaina nei lona lala e fesoasoani i mataupu faapea ma o loo faauluulu i le faletua ia Talei Solomon Mua ua maea ona resitala faaletulafono i lalo o le ofisa o femalagaaiga a niusila ma ua iai le tomai i le faatautaiaina o mataupu faapea. Taua i le pepa o faamatalaga mai le Mua Pacific Ltd o le fiafiaga sili ona ua siisii pea ma faaopoopo le aofai o tamafanau a Samoa e mafai ona tauaveina nei tiute. E lei mamao atu nei ona pasia ai le tulafono a le ofisa o femalagaaiga lea ua matua sa ai ona toe tuuina ni fautuaga tau femalagaaiga e soo se tagata e aunoa ma se laisene faufautua e pei ona umia nei e le faletua ia Talei. O le sooupu o le kamupani Sooalo Setu Mua na ia taua o le toatele o le atunuu e manaomia lenei fesoasoani ona o le feagaiga faauo a niusila ma Samoa ma o loo agavaa ai tagata samoa e malagamai i niusila i tausaga taitasi i lalo o le samoan quota scheme. O le tuualalo a le pulega o le ofisa fou i le mamalu o le atunuu e alofia le faatuai i mataupu faapea ona o le tele o mataupu e toe saili fesoasoani atu ae ua faigata ona ua ova aso pe ua tuanai foi se taimi sa tatau ona tuuina ai i totonu le talosaga. Faafetaia e le pulega o le Mua Pacific tamafanau a Samoa o loo faatinoina soo se matata eseese i niusila nei ma aoao manogi ai mo le sailia o se manuia mo le atunuu aemaise o aiga.
——————
O le agaga saili malo ma le tautua atunuu, tautua aiga foi ma ekalesia, o loo vaaia pea i vaiaso taitasi i niusila nei aemaise lava foi i Aukilani e ala i le tele o le mau polokalame ma sailiga seleni mo le faamoemoe e fausia ai ma faaleleia ni nofoaga mo tapuaiga aemaise o le atinaeina o aiga ma afioaga. E foliga faapea foi le faamoemoe o se tasi o afioaga mai le motu tele i Salafai o Fusi Safotulafai lea ua mafua ai ona tuufaatasia se tasi o a latou polokalame mo le aso toonai o le vaiaso fou i Otara. O alii faafiafia ua lauiloa i niusila ma atunuu i fafo o Tofiga Fepuleai ma Eteuati Ete poo le laughing samoans e pei ona iloa ai o nisi ia o totino moni o le afioaga o Fusi ona o o la tuaa o loo soifua mai pea ma o loo aumau nei i Ueligitone. Ua iai le maliega a nai tamafanau ia a le afioaga e malaga mai i Aukilani nei e faafiafia ma faatulaga se polokalame ua faaigoaina o le Laughing Samoans Greatest Hits mo le faamoemoe e sailia ai se seleni mo le faamaeaina o le galuega i le malumalu fou o le ekalesia iFusi.O le o loo tuufaatasia le faamoemoe o le sui o le afioaga o Rufo Pupualii na ia taua o se avanoa lelei ua tuufaatasia ai tamafanau a le afioaga ma pulupululima faatasi mo le faamaeaina o le galuega i le malumalu o le Atua. O le faamoemoe o le a faia i le Otara Recreational Center i Otara i le aso toonai o le vaiaso fou 14 o Ianuari ma e 15 tala tagata matutua ma le lima tala mo tamaiti.
—————–.
Ua lipotia i le aso i le intaneti ua maua le maliega e faataga ai ona fausia se taulaga faapitoa lava o le ekalesia Destiny i le itu i saute nei o Aukilani. O le faafeagaiga o Bishop Brian Tamaki o loo taua i le lipoti ua sainia se maliega ma le ekalesia i Rotorua ma o le a fausia le taulaga lea i se fanua i Druces Road i Wiri.; O loo taua i le lipoti le sailia e le taitai o le ekalesia o ni foai mai le ekalesia e faatupe ai le fausia o lea taulaga o lona uiga o le a fausia ai a latou lava aoga ma se iunivesite e pei ona taua i se tasi o lipoti. Fai mai o loo iai le fuafuaga a le ekalesia e faatau lo latou lala i Mt Wellington ina ia faatupe ai le faatauina o le fanua. O le 2008 na teena ai e le Destiny se lipoti a le televise tolu e faatatau i ni fuafuaga a le ekalesia mo le fausia o se nofoaga faapitoa i Manukau peitai la o lea e foliga mai ua faamaonia lea lipoti aemaise o le fausia o sa latou lava taulaga i totonu o aukilani i saute.
————-
Toe maua mai se lipoti lata mai mai Ausetalia e tusa o le faalavelave i le vaiaso nei ua maliliu ai tagata e toalua ona o le taumafaina o le cap mushroom. Ua faailoa mai nei e le matagaluega o le soifua maloloina i Canberra o le taumafa lea sa taumafaina e i latou ia sa iai le cap mushroom ae o se taumafataga sa saunia mai i se umukuka faapisinisi vae ane le faafofoga a le atunuu. I se pepa o faamatalaga ua faalauiloa i le aso i lea mataupu o loo taua ai e le pulega ua maea ona asia le nofoaga lea i Canberra ma ua iloa ai e le o iai se popolega i le saogalemu mo tagata lautele ona o le taumafa sa faia faapitoa lava mo e na taumamafa ai ma e leai se talitonuga na tausasami ai le lautele na iai i le faleaiga lea i lea aso. Fai mai le matagaluega e iai foi leisi tagata lea o loo togafitia atu i Sini i le faaletonu lava lea e tasi ae leai se sootaga agai i le faalavelave i le vaiaso nei i totonu o Canberra,
——————-
O tagata e iai o latou faafitauli pei o le tele o mafatiaga i le mafaufau depression e tele le avanoa e aafia ai i le gasegase o le fatu pe faaletonu foi lona malosi. O se suesuega sa faia ua iloa ai lenei tulaga e foliga mai o le depression e suia ai ma le tata o le fatu ma ono aafia ai i le gasegase o le fatu. O leisi itu le manuia o mafatiaga o le mafaufau e iu ai ina faateteleina le avanoa e maua ai i le suka ma e taatele tele i tagata e aafia gofie mafaufau i le ita ita gofie.O loo faia suesuega a le au popoto i le mataupu lenei ma se fofo o le faafitauli. Ole au saienitisi na o latou faailoa o sina faataitaiga laititi lava o loo manaomia ina ia faamautu ai nisi o iuga o suesuega ua maea ona faia i le tulaga lea aua o le itu lava tau ile soifua maloloina e taua ona malamalama lelei iai le tagata soifua.

Aafia taavale a le Council i le au tusi kapaka

Miriama Pomare — Thu, 05 Jan 2012 00:43:58 +0000

E fai si tele o taavale a le Council e toe maua lava e le au tusi paka I tausaga taitasi ae e foliga mai e toe faataga ona faaleaogaina a latou sala. O faamaumauga lata mai ua faailoaina I se lipoti I le aso o loo taua ai e upuia ma oo lava foi ina faaoolima tagata I le au tusipaka ma e taatele lava le tulaga lea I Upper Hutt I Ueligitone. Ua latalata I le 110 afe le faasalaga tupe o taavale e maua e le o usitaia tuutuuga I luga o kapaka I le umi e tatau ona faapaka ai le taavale aemaise foi o vaega e le tatau ona paka ai. O se tasi lava lenei o tulaga e masani ona aliali mai I taulaga faatau ma nofoaga faitele ma ua oo lava foi ina femisaaai ai tagata ma le au tusipaka ona o le le malamalama lelei I faatonuga ma tulafono I nofoaga faapea. O nisi o faasea ua aliae mai I le faaitu lava lea o Ueligitone o loo taua ai ua iloa e tagata e iai taimi ua toe faaleaogaina ai faasalaga o taavale a tagata faigaluega a le council ae o Taupo sa faamauina ai e 30 taavale a le council na faasala I le lua tausaga talu ai ona o le solia lava o tuutuuga I nofoaga faapea. O Aukilani lava latou e le o taua mai I le lipoti poo aafia ai ni taavale a le Council I lea tulaga ae o se tasi o faasea taatele a le atunuu I kapaka o le taugata tele o le tau e totogi e faapaka ai mo sina taimi iitiiti e pei ona iai I le aai tele I Aukilani ma isi foi vaega.

Faatuai ona faaulu au a Samoa ma Papua Niu Kini mo le Oceania

Miriama Pomare — Thu, 05 Jan 2012 00:42:53 +0000

O le faatuai ona faaulu au soka a Samoa ma Papua New Guinea I le tausinioga o le Oceania mo tamaitai I lalo o le tai 20 tausaga le matutua ua toe tolopo ai le taamilosaga sa tuu e talimalo ai Aukilani I le faaiuga o le masina nei. O le traamilosaga lea e saili ai au e mafai ona agavaa mo le tausinioga tele ia Aukuso o le ipu o le lalolagi I le soka I le vaega lava lea I lalo o le 20 tausaga e faia lea taamilosaga I Iapani; E nao Niu Sila ma Niu Kaletonia sa muai faaulu mo le Oceania ma ua manatu ai le fono faatonu a le Oceania ua alaga tatau ona toe tolopo sei toe fetuunai ma sauni au ia ua toe faaulu atu mo lea taamilosaga. O loo Iloilo I le taimi nei poo le a tonu le aso ma le nofoaga o le a faataunuu ai lea faamoemoe I se taimi o lenei tausaga. E tatau ona faia lea taamilosaga ae toe tolu masina oo I le taamilosaga o le ipu o le lalolagi. E le o taua pe na mafua I se a ona faatuai ona faaulu le au a Samoa.

Osofai le sekulati i lana moli uila

Miriama Pomare — Thu, 05 Jan 2012 00:41:48 +0000

E toatasi le tagata ua pue e leoleo I Thames ae o loo tau sailia isi ona o se faalavelae na osofaia ai se alii sekulati ao faia lana galuega I le po anapo I Thames. O le sekulati e 49 tausaga le matua sa alu lana petolo I se tasi o malae tutu I lea faaitu ae teia ai le au gaoi e toalima lea na taumafai e sosola ese peitai na maua e le sekulati leisi toatasi ma taofi loa ae o lana moliuila na pau ese ma lona lima I le taimi lea na toe faaaoga e le au gaoi e ta ai lona ulu sei vae ane le faafofoga a le atunuu ma aafia ai loa si sekulati lea I le po anapo. Fai mai leoleo e talitonu o leisi alii lea na maua e le sekulati o loo tigaina foi ona manuaga ona sa finau malosi le sekulati e pue le aualii iai. Ua agai leoleo e saili falemai o loo ono agai iai le aualii ia e togafiti foliga o leisi a latou tama lea na maua e le sekulati ae sa auina atu foi le sekulati I le falemai mo togafitiga mai ona manuaga mai lana moli uila.
——————–

Maliliu ona o le taumafaina o le cap mushroom

Miriama Pomare — Thu, 05 Jan 2012 00:38:58 +0000

O loo tigaina pea i le falemai i Sini Ausetalia se tasi tagata ona o le taumafaina o le mushroom i se pati o le tausaga fou sa faia. O le lua aso talu ai na maliliu ai isi ana uo e toalua na o latou taumamafaina uma le mushroom lea ma ua fautuiaina ai e fomai tagata mai le pikiina mai o wild mushrooms ona o le ona pe a le lelei ona faamamaina. E toafa tagata na aafia ai i le faaletonu lea ae toatasi na toe tea i tua i le aso lua a ua maliliu le toalua ma le toatasi lea o loo tigaina. O le tina e 52 tausaga ma le tama e 38 tausaga lea ua faamaonia ua maliliu ma o i latou uma ia e toafa e mai le atu asia ma o le cap mushroom sa o latou taumafaina masalo ua faaseseina ai i latou faapea o leisi ituaiga mushroom o le straw lea e taatele i Asia. Ua atoa ai la le toalima o tagata ua maliliu i le taumafaina o le cap mushroom i le sefulu tausaga talu ai ma le toa 15 sa matua ogaoga o latou aafiaga.

Sue le au gaoi i Wairoa

Miriama Pomare — Thu, 05 Jan 2012 00:38:22 +0000

O loo sue e leoleo le au gaoi i Wairoa na o latou osofaia ni tulisi talavouo ma sosola ese ma sikaleti ma tupe i le aso ananafi i le aoauli. O le faalavelave lea na lipotia mi e leoleo e faapea o le faalua ai lea ona tulai mai o osofaiga faapea i se tagata i le faaitu lea o Hawkes Bay i le vaiaso lava lenei. O loo talosagaina e leoleo le fesoasoani a le atunuu aemaise ona e toaiva talavou na aafia ai i le faalavelvae lea o isi pe a ma le 12 tausaga le matutua fai a latou ofu kegi. Fai mai leoleo mai le 12-16 tausaga le matutua na o latou osofai le tamaitai tulisi lea ma faamalosi le aveesea o ana tupe ma tapaa ae na maua e leoleo i se taimi mulimuli ane. O loo talia le taimi e tutu ai le toalima i le faamasinoga o talavou ao leisi toafa e ave i le Youth Aid. O le aso Gafua o le vaiaso nei na osofaia ai foi se talavou 24 tausaga ao savavali ane ma se tasi o ana uo i Napier ae osofai ai e ni talavou mai le kegi talitonuina o le Black Power ae na mafua ona osofai le talavou lea ona o lona ofu lanu mumu sa laeiina o le lanu lea o le kegi a le Mongrel Mob.

Faasa ona toe ulufale i Tauranga

Miriama Pomare — Thu, 05 Jan 2012 00:37:36 +0000

Ua tatala i tua le alii lea na aveina le taavale na maliliu ai le auso teine talavou mai Tauranga i le aso tonu lava o le Kirisimasi .Ua faailoa mai ua faasa ona toe ulufale i Tauranga sei vagana oni mataupu tau piosinisi aloaia. O Hetaraka Reihana 20 tausaga sa tulai i le aso i le faamasinoga i Tauragnga ona o moliaga o le fasioti tagata paivalea i le faalavelvea na maliliu ai ona tausoga masaga teine o Brooklyn ma Merepek Clark 13 male 14 tausaga le matutua. Sa i tua o le taavale o le ituaiga o le Honda lanu maroona sa faafoe mai e Reihana ao agai atu e asia le fanuatanu o le latou grandmother. Fai mai e lei faia ni fusipau o teneiti ia i le taimi na tupu ai le faalavelvae ma o se tasi lea o mafuaaga na atili ai ona faafaigata ona faasaoina o la ola. O le aso 23 o le masina lenei o Ianuari e toe fofoga ai i le mataupu ea i le faamasinoga.

Tulai le milionea faafuasei i le faamasinoga

Miriama Pomare — Thu, 05 Jan 2012 00:36:59 +0000

O le alii e suafa ia Leo Gao 31 tausaga lea na sola ese ma le atunuu ina ua milionea faatopetope lava i tupe a le Westpac na tuu sese i le la account ua toe foi mai nei ma o loo feagai ma moliaga o tupe teu faasolitulafono ma le gaoi. O le aso foi na tulai ai i le faamasinoga i Rotorua e tali i ona moliaga e 16 ona o le 10 miliona overdraft sa tuu i lana tusitupe i le masina o Aperila o le 2009.O le aso 23 o le masina nei ua toe tolo atu iai le faamasinoga ma o loo loka pea i le taimi nei. E lei leva ona maua e Lei Gao le vaegatupe tele lea i lana tusitupe ae sosola ese loa ma lana paaga agai i le atu Asia. Na toe foi mai le tamaitai ae sola pea lava Leo seia oo ina maua ai loa e leoleo ma toe faafoi mai i niusila mo ona moliaga.

Vali uliuli le Ea Niu Sila

Miriama Pomare — Wed, 04 Jan 2012 00:59:33 +0000

Ua toe vali lanu uliuli atoa foi le vaalele a le ea niusila ma ua faailoa ai foi lanu masani o le au a le atunuu le All Blacks. O le vaalele o le Boeing 777-300ER na vali e tagata e toa 14 i totonu o le 24 itula i le silia ma le vaiaso na faatino ai. Fai mai le sui o le kamupani o le galuega na faia ose tasi o galuega faigata tele ae e lagona lava le faagaeetia pe a laeiina le togiga a le au ma iloa ai le atunuu i le lalolagi. Fai mai nisi o tama taalo o le au e pei o Keiran Reid ma Andy Ellis na matamata ai i le vaa i le vaiaso na tea nei e manaia foi ae vali uma faapea vaalele a le kamupani. Fai mai o le vaa fou lea e le taumate o le a toatele e fia silasila iai i nofoaga e pei o Los Angelos, Lonetona ma Melepone pe a oo iai ana faigamalaga. O le masina nei sa tatau ona faamaea ai le galuega ma tuuina mai i le kamupani ma o loo iai le fuafuaga atonu e oo atu i le tausaga fou i le ogatotonu ua iai vaalele e ono a le ea niusila e vali uma faapea aua le auaunaga o le atunuu femalagai.

Tele tusifolau taufaasese faaaoga i Niu Sila

Miriama Pomare — Wed, 04 Jan 2012 00:58:55 +0000

Faagasolo nei suesuega a leoleo i ni mataupu ua aofia ai tusifolau niusila taufaasese na maua ao faia se siaki i luga o le intaneti faaaoga ai le faiga fou lea na amata faaaoga i le amataga o le tausaga nei. O tusifolau mai nuiusila nei e tele ina ia sailia e le au faatupu faalavelave aemaise o le au solitulafono faavaomalo ma o le tausaga na tea nei ua iloa e 47 lelei faamaumauga taufaasese na maua ai o tusifolau sa le tatau ona faaaogaina. O le suesuega sa faia na taua ai e le pule o le matagaluega o mataupu tau lotoifale David Philip e faapea o le tele o tusifolau ia na maua e fai lava e tagata sitiseni niusila ae ua tasui o latou ata ma faamaumauga ma e tele mafuaaga e alai ona fai. O nisi mafuaaga ona nei taofia i latou mai le malaga ese ma le atunuu ona o ni soligatulafono ia pe o loo aafia foi i ni soligatulafono tau tupe. O le 2003 na amata faalauiloa ai le faiga fou lea o le data matching poo le faafetauia o faamaumauga e aofia ai le au malilu ma tagata soifua mai. O tagata ua maliliu e otometi lava ona faaleaogaina o latou tusifolau.O tagata e umia tusifolau niusila e leai se faigata o femalagaaiga i atunuu i fafo ona o niusila e le o se atunuu high rsik i maliega faavaomalo tulaga tau puipuiga. E toatasi la le tagata ua molia ai i le mataupu lenei o se alii e suafa ia Yaumeng Lum na maua o ia umia faamaumauga o se tagata meleisia na ola ane i niusila nei ma sitiseni ai o Peter Hui ma ia faaaoga e maua ai sona tusifolau i le igoa lea. E 10 masina na faasala ai i lona aiga i le masina o Aukuso o le tausaga na tea atu nei.