Ua faamanonia mai e le susuga i le komesina o Fefatauaiga a Samoa i aukilani i le taeao nei e faapea, O le alii Samoa e toatasi mai le toalua sa totoe i Niu Sila mai galuega faavaitaimi, ua toe auina atu nei i le atunuu. O le aso ananafi e pei ona saunoa iai Paolelei Luteru, sa faatasi atu ai ma le alo o le atunuu i le malae vaalele i aukilani, ma faamavae atu ai i lona toe taliu atu i Samoa. Saunoa Pao e lei iai foi se finauga ma le kamupani na aumaia le au galulue ina ua tapa i latou mo le totogiina o le pasese o le ua toe faafoi. Sa talia lelei e le kamupani le faataunuuina o lea tulaga. Na faafetaia foi e le sui o le malo o Samoa le aiga ona o le fesoasoani ane i le mataupu ma le toe faafoi ane o le atalii. Sa toe faamantu foi e Luteru le taua o le tulaga ua toe faafoi ai le alo o le atunuu, ona o le a mafai ona maua le avanoa e toe asiasi mai ai pe a toe filifila, ia pe asiasi mai foi i aiga i Niu Sila e aunoa ma se faasalaina. Ao le isi na ave faalaosi muamua, o le a le mafai ona toe maua sona avanoa e toe ulufale mai a ii Niu Sila.