O loo lomia i le Samoa Times o le vaiaso nei se faamatalaga sa tusia e le faipule o Magele o Sua William Sio e faatatau i lona mitamitaga i si o tatou atunuu o Samoa ona o se asiasiga talu ai nei a le vaega faaupufai a le leipa na malaga faatasi ai ma le minisita o le va i fafo a Niu Sila o Murray MCcULLY e asiasi ai polokalame tau atinase sa fesoasoai ai i faalapotopotoga i atumotu o le pasefika. O se faamatalaga a Sua o loo taua ai le lagona o lona fiafia ina ua faatusa e nisi o faipule o le malo o Niu Sila na o latou malaga faatasi Samoa o le togalaau poo le faatoaga o Etena ona o lona matagofie tele. Faamatala e le alii faipule le tele o le eseesega o Samoa ma nai isi atumotu na agai iai le latou faigamalaga e aofia ai Solomona, Kilipati ma le atunmotu o kelisimasi. Momoli ai le agaga faafetai o le alii faipule i le palemia ma le malo o Samoa ona o galuega lelei i le faatumauina o le atinae o Samoa ae faafetaia ai foi ma tagatanuu o Samoa ona o le loto toa ma le faamatagofieina pea o si o tatou atunuu e ui ina toatele nai aiga e laititi tupe maua ma faaletonu le tamaoaiga.