E tai 350 tala niu sila a le tagata faigaluega o le a maua i le vaiaso i le fuafuaga ua faalauiloa nei e le palemia mo i latou i Christchurch ua aafia a latou galuega ona o le mafuie. O le fuafuaga lea a le malo ua tali ai i manaoga nai tagata ua afaina i lenei faalavelave ma e ono oo atu i le 100 miliona e faatupe ai lenei fuafuaga.E ono oo atu le aofia o tagata faigaluega e agavaa i lalo o lenei fuafuaga i le 77 afe e ui e manatu nisi e le taumate e toe maua ni galuega a le toatele i le mau galuega toe faaleleia o le a amata faagasolo nei i Christchurch. Ua nao le tutu o tagata ma tagatagai ma le faanoanoa i le tulaga ua iai o latou maota ma laoa faapea foi i nisi o pisinisi.E lei iai ni faitioga mai isi vaega faaupufai i le aso ananafi ina ua muai folasia e Key lea tulaga pau le faamatalaga a Phil Goff, na ia taua ai o nai mea amata ao tau fai galulue le malo ma tagata i le faaleleia atili o le aai. O le taimi nei ua lipotia mai le tele ina toe tatala o isi pisinisi i le taulaga i Christchurch ma ua faagasolo foi taumafaiga e pei ona masani ai ma le fautuaga mai leoleo ia alofia le uia o vaipanoa o loo faasaina ina nei aafia ai se tasi