Ua faaalia i lipoti tusitusia i luga o upega o fesootaiga le iai o sui o le ekalesia a le Destiny ua o latou taua e iai foi si malosi o le unai a le ekalesia i mataupu tau faaipoipoga. O le aso ananafi na faasalalauina a ii le nusipepa o le Taranaki Daily News tautinoga a nisi o alii e toatolu mai Taranaki sa lolotu a ii le ekalesia lea ma talu mai lea tusitusiga ua faaopoopo atu le numera o telefoni ma imeli i le nusipepa e lagolago ai le mau a ia alii. O isi o ia tuuaiga e pei ona faaalia o loo unai malosi ai le ekalesia ia tetee pe nofo valavala se ulugalii e afai ua manao se tasi e alu ese ma le ekalesia. Ui i ia tuuaiga ae na faaalia foi i lea lava faamatalaga e le sooupu o le ekalesia lea o Janine Cardno e le talafeagai le faia o ia faamatalaga ona e le gata ina solia ai tulaga faalilolilo o mataupu e faatatau i tagata o loo lolotu nei i le ekalesia ae e aafia ai foi ma e sa iai muamua. O molimau mai isi tagata e aofia ai se tina mai Hamilton o Cindy Johnston na taua ai le tetea foi ma lona toalua ona o le mataupu lava lea i le ekalesia ma sa ia lagona ua tele atu le unai mo tupe ma foai mo le ekalesia.